У Заводзе за културу войводянских Руснацох у Новим Садзе, 18. юния отримане стретнуце з младим українским писательом Андрийом Любком. Модератор бул Александер Мудри, а Андрийову творчосц представел Стеван Брадич з Оддзелєня за компаративну литературу Филозофского факултета у Новим Садзе.
– Тот млади писатель розвива цошка нове, автентичне. Обраца нам увагу на каждодньове искуство и нє сцека до абстракциї и мистификациї. Найвецей пише любовни писнї, хаснує иронию, шведочи културу и одкрива свою партикуларносц и одношенє зоз штредком – гварел Брадич.
Одвитуюци на питанє як випатра литературна сцена у України, Любка одвитовал же подобно як и у Сербиї, Мадярскей и централно-европских державох, а розлики обачлїви медзи старшу и младшу ґенерацию.
– Маме урядову литературу, односно Союз українских писательох, хтори ше закладаю за моралносц и патриотизем, а єст и иншака литература, андерґраунд. Гоч Україна велька держава, тиражи кнїжкох мали и млади поета чежко може обявиц дацо у часопису лєбо кнїжки. Прето млади обявюю на интернету. Особнє, я мержим риму и „патос” у поезиї, теми слизи, опадованє лїсца и чежину єшенї. Тераз баржей пишем прозу, як поезию – гварел Андрий Любка.
Стретнуце орґанизовали здруженя Цма комора и Виглєдовацки круг, як и Завод за културу войводянских Руснацох.