Стретнуце з одкупйовачами на „Дньох керестурскей паприґи“

автор сен 
723 Опатрене

РУСКИ КЕРЕСТУР – Манифестация „Днї керестурскей паприґи“ всоботу, 15. авґуста, почала зоз сходом паприґарох, представительох хемийних хижох и одкупйовачох паприґи, котри обишли три парцели под паприґу. Потим продуковательом отримани кратши презентациї и совитованя представительох хемийних хижох, котри им понукали средства за прикармйованє и защиту паприґи.

Под час обиходзеня польох продукователє коментаровали же тогорочна паприґа нє будзе такого квалитету як влонї, насампредз пре длуготирваци високи температури. Оберанє паприґи почало прешлого тижня, кеди ше ю одкупйовало на двох местох, по 60 динари за килу за першу класу.

– Пре горуцу хвилю яку зме мали цале лєто, паприґа нє будзе такого квалитету, та анї квантитету як влонї. Медзитим, ситуация така и у других местох, а Керестур заш лєм познати по продукциї и квалитету паприґи, та верим же зме ю и того року годни добре пласовац. На Манифестацию нам пришли коло 10 представителє одкупйовачох, котри за тераз нє бешедую о цени, но уж познате же того року у Керестуре будзе вецей одкупйовачох и одкупни места як влонї – гварел предсидатель Здруженя паприґарох „Капсикум анум“ Владимир Варґа.

На штандох у центре валалу дзепоєдни паприґаре викладали билу, парадичову и рогову паприґу, алє и другу желєняву и овоц.

Вецей фотоґрафиї у окремней ґалериї на правим боку нашого сайту.

4-Poljo-02

ПОВЯЗАНИ ТЕКСТИ