Студенти руского язика нащивели институциї у Руским Керестуре

автор маф
1.1k Опатрене

РУСКИ КЕРЕСТУР – Нашо институциї у Руским Керестуре вчера нащивели 15 студенти з Филозофского факултету у Новим Садзе зоз своїма професорами, векшином студенти котри на Одсеку за русинистику виучую руски язик як виборни предмет. У нащиви були и порядни студенти нашого Одсеку.

Студенти перше нащивели Основну и штредню школу з домом школярох „Петро Кузмяк”, дзе их приял секретар Михайло Надь, котри им бешедовал о историяту тей нашей образовней установи. О историйним контексту приселєня Руснацох и розвою нашого образованя и култури студентом бешедовал историчар Сашо Сабадош зоз Зомбора.

У шедзиску Националного совиту (НС) Руснацох студентох приял предсидатель Вивершного одбору Совиту Желько Ковач и упознал их з його роботу и компетенциями. У просторийох НС у Замку роботу РНТ „Петро Ризнич Дядя” представела директорка Ивана Дудаш, а роботу НВУ „Руске слово” одвичательни редактор новинох др Борис Варґа. На дарунок достали и прикладнїки новинох и часописох нашей видавательней хижи.

Госци опатрели и музейну збирку у Замку, нащивели Катедралну церкву св. Оца Миколая, дзе их з тоту институцию упознал капелан о. Владимир Медєши, а на концу нащивели и Марийово святилїше Водицу.

Вилєт студентох котри виборно виучую руски язик спред Одсеку за русинистику орґанизовал їх професор мср Александар Мудри, з финансийну потримовку Одбору за образованє нашого НС, а зоз студентами була и висши лектор Ксения Сеґеди и докторантка мср Ана Римар.

ПОВЯЗАНИ ТЕКСТИ