НОВИ САД – На вчерайшей 13. порядней схадзки Вивершного одбору (ВО) Националного совиту (НС) Руснацох, хтора отримана у Заводзе за културу войводянских Руснацох у Новим Садзе, гварене же по ребалансу буджету АП Войводини НС Руснацох достал 150 000 динари за розвойну и 584 000 динари за порядну дїялносц, так же ушлїдзи и ребаланс буджету НС.
Як гварел предсидатель ВО Желько Ковач, з достатого пенєжу з АП Войводини у ребалансу буджету НС будзе предложене же би, медзи иншим, Завод за културу войводянских Руснацох достал 100 000 динари, НВУ „Руске слово” 50 000, подручни канцелариї НС по наших местох вєдно 100 000 динари, за адаптованє Руского дому у Коцуре би були опредзелєни 300 000 динари, а єдну часц средствох би ше наменєло за резерву.
На ВО поведзене же порядна схадзка НС Руснацох будзе 3. новембра (штварток) у Руским Керестуре, так же порадзене и о предкладаню других точкох дньового шору за наступну схадзку Совиту.
Вчера на ВО бешедоване и о потреби за векшу активносцу у пестованю нашей традициї и идентитету, як и о орґанизованю предстояцей Централней преслави националного швета Руснацох и єй финансийним боку.
