ТАД почал ювилейну, седемдзешату сезону

автор лем.фм/зам
931 Опатрене

ПРЯШОВ (СЛОВАЦКА) – Вчера, 9. септембра, з виводзеньом представи „Ковалє” сербского автора Милоша Николича, у режиї Любослава Маєри з Бачкого Петровцу, Треатер Александра Духновича (ТАД) з Пряшова почал свою ювилейну, седемдзешату театралну сезону. Премиєра спомнутей представи на сцени того єдиного правого русинского тератру на швеце була 22. мая того року.

ТАД основани 24. септембра 1945. року, а свою першу премиєру, представу „Ой, не ходи Грицу”, одбавел у марцу 1946. року. Основани є як здруженє гражданох на основи Ришеня Українскей народней ради Пряшовщини у Пряшове як Українски национални театер. Од початку 1951. року снователь Театру була Крайова народна рада у Пряшове, од 1961. року Крайова народна рада у Кошицох, од 1969. по конєц 1997. року Министерство култури Словацкей, од початку 1998. року Крайови уряд у Пряшове, же би од 1. априла 2002. року снователь и главни финансиєр ТАД постал Пряшовски самоуправни край, цо є и нєшка.

Пременка назви до Театер Александра Духновича була 15. октобра 1990. року, з Ришеньом министра култури Словацкей Републики. ТАД професийна, културна и уметнїцка институция, чия основна дїялносц пестованє и розвой културного живота Русинох у Словацкей.

У своїх початкох, представи перше виводзел по русийски, 50-тих рокох прешлого вику по українски, а 80-тих рокох поступнє прешол на русински язик, хтори остатнї 25 роки и тераз главни язик виводзеня представох – од шветовей и домашнєй класики, по сучасни драмски твори. За собу ма вецей стотки премиєри и тисячи репризи у Словацкей и иножемстве, а тераз є и єден з найприпознатших и наградзованих театрох у Словацкей.

Уж вецей роки директор ТАД Марян Марко, а уметнїцки руководитель ансамблу Любомир Миндош. Бувши драматруґ ТАД Василь Турок Гетеш бул и перши предсидатель Русинскей оброди Словацкей и перши предсидатель Шветового конґресу Русинох/Руснацох/Лемкох.

 6-TAD-02

ПОВЯЗАНИ ТЕКСТИ