СВИДНЇК (СЛОВАЦКА) – У Свиднїку, у Словацкей, пондзелок, 23. мая, почал Штварти Фестивал русинскей култури, популарно наволани Русински фестивал, а будзе закончени на нєдзелю, 29. мая. Понеже Фестивал задумани як предствянє култури Русинох зоз Словацкей и поза єй гранїци, цалотижньова програма понукла атрактивни вистави, презентациї русинских установох, театрални представи, проєкциї филмох, наступ музично-танєчних ансамблох дзецох и старших, як и концерти популарних музичарох и шпивачох зоз Словацкей.
Русински фестивал пондзелок, у Поддуклянскей библиотеки, отворели представитель Окружней орґанизациї Русинскей оброди у Свиднїку Милош Стрончек и городоначалнїк Свиднїку Ян Голодняк, а на першей програми представени Музей русинскей култури з Прешова Словацкого народного музею, о хторим бешедовала його директорка Олґа Ґлосикова.
Вовторок на Фестивалє бул дзень театру, дзе перше по русински бавени дзецински представи, а потим наступел и Театер Александра Духновича з Прешова, з представу „Фантазия”. Вчера представителє Институту русинского язика и култури Прешовского унивезитету бешедовали о русинским язику у Словацкей и поза єй гранїци, а нєшка представителє Здруженя интелиґенциї Русинох Словацкей з нащивителями буду бешедовац о асимилациї.
На ютре у свиднїцким амфитеатру починаю и музично-танєчни програми и концерти числених русинских дзецинских и ансамблох старших зоз Словацкей и иножемства, цо будзе предлужене и на соботу, а Фестивал будзе закончени на нєдзелю, з тиж пополадньовим наступом музично-танєчних ансамблох, а на вечар з ґала-концертом популарней шпивацкей ґрупи „Кандрачовци”.
Главни орґанизатор Фестивалу Окружна орґанизация Русинскей оброди у Свиднїку, а соорґанизатор место Свиднїк.