Того викенду „Коцурска жатва 2015”

автор зам
798 Опатрене

КОЦУР – Фестивал фолклорних традицийох Руснацох и других националних заєднїцох „Коцурска жатва 2015” будзе отримани того викенду – на пияток и соботу, 10. и 11. юлия.

През два днї буду отримани вистави фотоґрафийох пошвецени Фестивалу, алє и 25-рочнїци Културно-уметнїцкого дружтва ”Жатва” з Коцура, будзе промоция руских кнїжкох, етно-столи з традицийнима єдлами, програми за младих и наймладших, як и наступ танєчних ансамблох.

Главна програма „Коцурскей жатви 2015”, на хторей наступя фолклорни ансамбли Руснацох и других националниох заєднїцох, будзе на соботу, 11. юлия на 21 годзин у Велькей сали Дому култури у Коцуре.

Фестивал „Коцурска жатва” у Календаре репрезентативних манифестацийох Руснацох Националного совиту, хтори го и финансийно потримує вєдно з Општину Вербас, Покраїнским секретариятом за културу и явне информованє, Покраїнским секретариятом за образованє, предписаня, управу и национални меншини-заєднїци и Покраїнским секретариятом за привреду, обезпечованє роботи и ровноправносц полох АПВ.

 

ПОВЯЗАНИ ТЕКСТИ