МИКЛОШЕВЦИ – На соботу и нєдзелю, 27. и 28. авґуста, у Миклошевцох будзе отримана 31. Културна манифестация „Миклошевци” – смотра културней творчосци Руснацох у Горватскей.
Манифестация на соботу, 27. авґуста, почнє з промоцию кнїжкох и подобову виставу Владимира Провчия з Матульох, а потим цаловечарши концерт отримаю члени домашнього КУД „Яким Ґовля” и госцуюцого КПД „Дюра Киш” зоз Шиду, з Войводини.
На нєдзелю, 28. авґуста, после кладзеня венцу, дополадньовей Служби Божей и отвераня вистави у Етно-збирки миклошевского музею, пополадню будзе отримана смотра фолклору „Поздрав ровнїни”, на хторей наступя КУД Руснацох у Горватскей и їх госци.
На нєдзелю пополадню у Миклошевцох обчекую и приход бициґлистох з Войводини, а Манифестация „Миклошевци 2016” будзе закончена з програму „Вечар рускей шпиванки”.
Културну манифестацию „Миклошевци 2016” орґанизує КУД „Яким Ґовля” з Миклошевцох, под покровительством Совиту за национални меншини Републики Горватскей и зоз сопокровительством Општини Томповци и Союзу Русинох Републики Горватскей.
