Того викенду „Петровски дзвон”

автор зам
1.3k Опатрене

ПЕТРОВЦИ (ГОРВАТСКА) – Централна манифестация култури Руснацох у Горватскей „Петровски дзвон” будзе того викенду, од 3. по 5. юний, у Петровцох.

Уж 43. „Петровски дзвон” того року будзе отримани у знаку 185-рочнїци приселєня Руснацох до Петровцох и Горватскей, 180-рочнїци грекокатолїцкей парохиї у Петровцох и 45-рочнїци часопису „Нова думка”. Фестивал будзе отримани под покровительством Совиту за национални меншини Републики Горватскей и з финансийну потримовку Вуковарско-сримскей жупаниї.

Нєпоштредни орґанизаторе „Дзвону” Союз Русинох Републики Горватскей з Вуковару и КУД „Яким Гарди” з Петровцох.

Петровски дзвон” на пияток, 3. юния почнє у Етноґрафскей збирки з приказом обичаю рубаня майского древка, а у истим просторе 4. юния буду отворени три вистави – иконох о. Михайла Гардия з Метлики, зоз Словениї, древорезох Йовґена Сопку з Петровцох и сувенирох Михайла Панковича з Пишкуревцох.

На соботу будзе и промоция кнїжкох – Миколу Папа, Владимира Провчия и ґрупи авторох, а потим и Музично-литературни вечар руских писательох з Горватскей, хтори пошвецени спомнутим ювилейом.

На нєдзелю, 5. юния, перше будзе манифестация дзецох „Петровски дзвончок”, а потим и смотра музично-фолклорней творчосци Руснацох у Горватскей и їх госцох „Петровски дзвон”. Попри руских, на обидвох маниферстацийох буду участвовац и ансамбли других меншинох, а на главней манифестациї предвидзени наступ и членох КУД „Петро Кузмяк” з Нового Орахова.

ПОВЯЗАНИ ТЕКСТИ