НОВИ САД – У Новим Садзе того викенду, 9. и 10. децембра, будзе 14. Руски фестивал малих сценских формох „Дюра Папгаргаї”, у орґанизациї Матки-Дружтва Руснацох Нового Саду-Войводини, Городского одбору Рускей матки Нови Сад и новосадского Руского културного центру (РКЦ).
Фестивал того року будзе у просторийох РКЦ (Йована Суботича 8), дзе на пияток, 9. децембра, у Велькей сали будзе Омаж Миркови Ґаднянскийови з нагоди 15 рокох од його упокоєня, промоция найновшого числа глашнїку Рускей матки „Руснак” и представянє першого Руского филмского фестивалу „Русин Филм Фест”, з проєкцию документарного филму о вельким страданю Руснацох на Горнїци у Першей шветовей войни.
На соботу, 10. децембра, у рамикох Фестивалу у РКЦ будзе отворена вистава малюнкох Мариї-Маї Бесерминї и Гелени Сивч, а потим виводзенє двох монодрамох.
На 14. Руским фестивалє малих сценских формох „Дюра Папгаргаї” того року буду виведзени монодрами „Шветочни Крачунски сукнї” („Свечане Божићне хаљине”) автора Радомира Мильойковича, котри источашнє и ґлумец и режисер своєй монодрами, та „Пес мой найлєпши приятель” Владимира Кочиша, котри тиж ґлумец и режисер тей монодрами. Кочишова монодрама витворена у продукциї Драмского студия дакедишнього РКДП Нови Сад.
Фестивал финансийно потримали Городска управа за културу Нови Сад и Национални совит Руснацох.