Того викенду Руски фестивал малих сценских формох

автор зам
884 Опатрене

НОВИ САД – У Новим Садзе на пияток, 4. децембра, почина тогорочни Тринасти Руски фестивал малих сценских формох „Дюра Папгаргаї”, а тирва по нєдзелю, 6. децембер. Фестивал орґанизую „Матка-Дружтво Руснацох Нового Саду-Войводини” и Городски одбор Рускей матки Нови Сад.

На Руским фестивалє малих сценских формох „Дюра Папгаргаї” того року участвую шейсц театрални представи, шицки з вецей ґлумцами (од два до штири), и то два з Коцура, та по єдна з Руского Керестура, Вербасу, односно копродукцийна представа РНТ „Петро Ризнич Дядя”, Шиду и Нового Саду.

Як и дотераз, Фестивал будзе у Театралней сали Ґимназиї „Лаза Костич”, представи починаю на 19 годзин, а под час Фестивалу будзе орґанизована и вистава з тогорочней Подобовей колониї Етно-клубу „Одняте од забуца” и Месного одбору Рускей матки Коцур.

Орґанизованє Руского фестивалу малих сценских формох „Дюра Папгаргаї”, хтори и у Календаре репрезентативних манифестацийох Националного совиту Руснацох, финансийно потримую Город Нови Сад, АП Войводина и Национални совит Руснацох.

ПОВЯЗАНИ ТЕКСТИ