РУСКИ КЕРЕСТУР – У Руским Керестуре того викенду, од 26. по 28. юний, будзе отримани 54. Фестивал рускей култури „Червена ружа”.
Шицки програми „Ружи” буду у керестурскей Школи „Петро Кузмяк” – у голу, на отвереней сцени у дворе и на спортских теренох, а Фестивал на пияток, 26. юния почнє з отвераньом вистави подобових роботох академского уметнїка Милана Колбаса з Ветернику. Исти дзень будзе отримана и манифестация дзецох „Червене пупче”.
На соботу, 27. юния, дополадня почнє Керестурски саям, того року з акцентом на стари ремесла, а на вечар буду два програми – Шветочни концерт „На штред широкей ровнїни” и „Естрадни концерт”. Попри наших учашнїкох, на Шветочни концерту, , наступи и професийни ансамбл з Пряшова, зоз Словацкей, популарни ПУЛС.
На Естрадним концерту участвую Цоле (Звонимир Кочиш) и тамбураше „Још ову ноћ” з Нового Саду.
Фестивал на нєдзелю, 28. юния, будзе закончени зоз свою найстаршу манифестацию „Червена ружа”, односно змаганьом младих шпивачох за найкрасши глас и виводзеньом и змаганьом нових руских забавних композицийох.
После шицких манифестацийох у дворе Школи будзе орґанизована розвага зоз „живу” музику.
Фестивал рускей култури у Календаре репрезентативних манифестацийох Руснацох Националного совиту, а финансийно го потримую Министерство култури и информованя Републики Сербиї, Покраїнски секретарият за културу и явне информованє АП Войводини, Покраїнски секретарият за образованє, предписаня, управу и национални меншини-заєднїци АП Войводини, Општина Кула и Месна заєднїца Руски Керестур.