РУСКИ КЕРЕСТУР – На пияток, 24. юния, у Руским Керестуре почина 55. Фестивал рускей култури „Червена ружа” и будзе тирвац по нєдзелю, 26. юний.
На найстаршим и найвекшим фестивалє Руснацох на тих просторох того року буду отримани шейсц културно-уметнїцки манифестациї и три провадзаци програми, а орґанизатор – керестурски Дом култури, у сотруднїцтве з меснима здруженями и орґанизациями, за нащивительох пририхтує и програму за розвагу.
Фестивал рускей култури „Червена ружа” на пияток и соботу будзе отримани на отвореней сцени у дворе Школи „Петро Кузмяк”, а на нєдзелю у Велькей сали Дому култури.
Фестивал на пияток, 24. юния, почнє на 17 г. з отвераньом вистави подобових роботох Андєлки Античевич з Беркасова, а вистава будзе у голу Дому култури. Исти дзень на 18 г. будзе манифестация дзецох „Червене пупче”, а на 21 г. „Одгуки з ровнїни”, на хторей наступаю КУД з наших местох.
Под час „Ружи” на соботу, 25. юния на 10 г. будзе отворени Керестурски саям (коло Майсторского дому), а у исти час у Спортскей гали Медзинародни турнир у одбойки, у рамикох СБ „Яша Баков”. После турниру у одбойки, у Спортскей гали буду спортски змаганє дзецох и особох з окремнима потребами.
На соботу на 20 г. будзе Шветочни концерт „На штред широкей ровнїни”, на хторим наступя нашо ансамбли з вибранима точками, а як госц ансамбл КУД „Сербия” з Кули.
Исти дзень, на 22. г. у дворе Школи будзе Естрадни концерт, на хторим участвує Тамбурашски состав „Равница” зоз Суботици.
Фестивал на нєдзелю, 26. юния, будзе закончени зоз свою традицийну манифестацию „Червена ружа”, на хторей ше за найкрасши дзивоцки и леґиньски глас буду змагац штернацецеро млади шпиваче з наших местох.
Отримованє Фестивалу рускей култури „Червена ружа” финансийно потримую Министерство култури и информованя Републики Сербиї, Покраїнски секретарият за културу и явне инфомованє, Покраїнски секретарият за образованє, предписаня, управу и национални меншини-заєднїци, Општина Кула и Месна заєднїца Руски Керестур.
