ЧЕРВИНКА/ЖАБЕЛЬ – У компанийох „Геленик шуґар” и „Суноко” потвердзели же того року цвикла добре зродзела, так же у „Геленику” обчекую же випродукую аж 10 тони сирового цукру з єдного гектару, цо на уровню компанийох у Нємецкей и Французкей, водзацих у Европи у продукциї цвикли и цукру.
Обидва компаниї плаца 35 еври за тону цвикли, так же, як гваря прерабяче цвикли, векши продукователє того року можу витвориц бруто-приход од коло 3 000 еври по гектаре.
Оценєте же цаганє и преробок цвикли на їх сировинским секторе будзе тирвац ище коло 7 тижнї, а наявели же того року нє будзе проблеми з виплацованьом за придату цвиклу.
Як преноши РТВ, сиґурне же того року цукровня у Сенти, хтора нєдавно припоєна „Суноку”, после 55 рокох нє будзе робиц, алє по рочней павзи знова роби Цукровня „Шакашска” у Жаблю, хтора, як и Цукровня у Червинки, дїлує у рамикох греческей компаниї „Геленик шуґар”.