СЕРБИЯ – Того року у Сербиї плановане же под аренду буду дати 460 000 гектари державней жеми, цо за 130 000 гектари вецей як влонї, а аж того року шицки локални самоуправи принєсли програми за ушоренє и хаснованє державней жеми. Перши раз на час то поробели и општини Вербас, Зомбор и Панчево, у хторих єст вельо державней жеми, гварел державни секретар у Министерстве польопривреди Желько Радошевич на стретнуцу з польопривреднїками котри обрабяю вельки поверхносци жеми як польодїлци, лєбо статкаре.
– Вименки и дополнєня Закона о жеми даваю резултати нє лєм у уводзеню шора у роботи локалних самоуправох, алє и у витвореним приходу од аренди, та ше обчекує же тот приход будзе медзи 49 и 53 милиони еври – гварел Радошевич, наглашуюци же держава инсистує на дошлїдним запровадзованю закона, хтори подрозумює и же би у шицких локалних самоуправох було запровдзене лицитованє державней жеми.
Бешедуюци о державней политики у статкарстве, же чи ше опредзелї за вецей тисячи менши фамелийни, чи за 10-15 вельки индустрийни фарми, державни секретар Радошевич гварел же о тим ище будзе водзена розправа, алє, як гварел, кед сцеме же би млади людзе оставали на валалє, мушиме их за тото и мотивовац и винєсол свойо думанє же лєпше мац вельо менши фарми.
На схадзки прилапене предкладанє статкарох же би ше арендованє державней жеми огранїчело на 200 гектари по фарми, як и же би ше живинарство виключело з права на першенство при браню державней жеми под аренду.