НОВИ САД – У тим школским року до першей класи основней школи уписани 17 848 першокласнїки, за 803, лєбо 4,31 одсто менєй як прешлого школского року, винєшене вчера на схадзки Покраїнскей влади у анализи стану у предшколским, основним и штреднїм образованю на сербским и на язикох националних меншинох.
Наставу на сербским язику слухаю 15 758 школяре першей класи ОШ, на мадярским 1 586, словацким 344, румунским 106, на руским 33, а на горватским 21 школяр. На схадзки винєшени податок же у тим школским року у основних школох на словацким язику звекшане число уписаних школярох до першей класи, а зменшане число школярох котри слухаю наставу по сербски, мадярски, руски, горватски и по румунски.
У тим школским року у Войводини до перших класох рушели 105 школяре з почежкосцами у розвою, цо вецей як 11 одсто у одношеню на прешли рок.
До перших класох штреднїх школох уписани 16 733 школяре. У штреднїх школох у котрих настава на сербским, мадярским и горватским язику школярох єст менєй у одношеню на прешли рок, а у штреднїх школох по руски, словацки и румунски єст вецей школярох уписаних до першей класи.
У школским 2013/2014. року наставу на язикох националних меншинох-заєднїцох слухали 2 324 школяре осмих класох, и вецей як 75 одсто предлужели школованє на мацеринским язику, гварене на схадзки Покраїнскей влади.
Пририхтуюца предшколска програма ше у Войводини окончує у 44 предшколских установох и 52 основних школох, а того року з тоту програму облапени 17 505 дзеци. У одношеню на прешли рок, число дзецох котри ше пририхтую за школу менше за коло 3 одсто.