БЕОҐРАД – У Скупштини Сербиї вчера отримана розправа о Предлогу закона о одбрани од каменцу, дзе винєшени суґестиї хтори помогню же би Сербия мала ефикаснєйшу систему охрани од каменцу. Министер нукашнїх дїлох Небойша Стефанович гварел же того року єст пенєжи за 14 500 процивкаменцово ракети, цо вецей у одношеню на прешли роки.
Посланїк Новей Сербиї Драґан Йованович предложел же би ше зоз законом оможлївело општином же би софинансовали набавку ракетох и плаценє штрелячох, же би на тот способ интервеновали и виратовали своїх польопривреднїкох. Йованович тиж глєдал же би час оценьованя чкоди од каменцу було предлужене з терашнїх седем, на 45 днї.
Предлог закону дефинує же Републични гидрометеоролоґийни завод превежнє заняти и поставени особи, права, обовязки, предмети, опрему, средства за роботу и архиву од Сектору за позарядово ситуациї. Спрам того, субєкти системи охрани од каменцу буду орґани державней управи, автономней покраїни и єдинкох локалних самоуправох, хтори би мали обезпечиц добре функционованє єдинственей системи охрани од каменцу на териториї Сербиї.