ШИД – На Перши дзень Велькей ноци у нашей церкви у Шидзе було окреме торжествено, а на богослуженьох присуствовали числени вирни, окреме млади и дзеци.
Службу Божу на Вельку ноц у Шидзе служел парох о. Михайло Режак, котри пречитал и Вельконоцну винчованку апостолского еґзарха за грекокатолїкох у Сербиї, владики Георгия Джуджара.
О. Режак шицким повинчовал швето и подзековал вирним котри з добродзечнима прилогами допомогли обнову мурика опрез Лєтнєй владическей резиденциї. Як гварел, за оправянє мурика значни средства опредзелєли и АП Войводина и Општина Шид, та попри малтерованя, покладзени нови роштелї и капура, а мурик будзе и обилєни.
По Служби у церковней порти о. Режак пошвецел прейґ 40 кошарки з пасками, а на Други дзень швета було мированє.
