БЕОҐРАД – Представителє традицийних церквох и вирских заєднїцох у Сербиї виражели протест процив предкладаня министра просвити Срдяна Вербича же би ше редуковало, а потим и утаргло виронауку у школох.
– Нашо нєодоброванє ище моцнєйше прето же министер винєсол предкладанє праве у року кед означуєме 15-рочнїцу врацаня вирскей настави до школох, по моделу з хторим ше цешиме прето же виражує дух демократичносци, ровноправносци и подполней медзивирскей согласносци хтори нєшка, та и надалєй, треба же би характеризовали нашу державу – сообщели традицийни вирски заєднїци у новинох „Политика”, а пренєсли нашо медиї.
Текст, хтори у „Политики” обявени як оглашка, подписали представителє Сербскей православней церкви, Римокатолїцкей церкви-Медзинродней бискупскей конфереренциї Святих Кирила и Методия, Исламскей заєднїци у Сербиї, Словацкей євангелистичней церкви, Євангелистичней християнскей церкви, Реформаторскей християнскей церкви и Єврейскей заєднїци Сербиї.