БЕОҐРАД – Гоч им то наклада закон, коло 30 одсто роботодавательох у Сербиї роботнїком нє виплацує цепле костиранє, гварел подпредсидатель Союзу самостойних синдикатох Сербиї (СССС) Душко Вуйович.
На представяню „Системи бонох як средства плаценя за костиранє роботнїкох у предавальньох и ресторанох” Вуйович визначел же би вецей роботнїки доставали цепле костиранє кед би ше почало применьовац бони, цо уж зажило у 19 державох Европскей униї.
Кажда держава одредзує вредносц ваучера за костиранє, гварел Вуйович и дал приклад же у Румуниї ваучер вредзи 10 еври дньово, а до тей мрежи уключени коло 40 000 предавальнї и ресторани.
Вон наявел же од 24. по 26. фебруар будзе отримана конференция з тему „Система бонох як средство у служби економского розвою и социялного напредованя у Сербиї”, у орґанизациї Синдикату и „Ап“ („Up”) ґрупи.