Трибина о насилстве над женми

автор сас
905 Опатрене

ЖАБЕЛЬ – Стреду, 30. новембра, у сали Скупштини општини Жабель отримана трибина „Насилство злодїйство – прияв го” у рамикох Медзинародней кампанї „Шеснац днї активизму процив насилства над женми”, хтору ше запровадзує од 1991. року.

На трибини винєшени информациї о способе защити женох од насилства, як и о змоцньованю локалних институцийох за даванє адекватней потримовки женом котри церпя насилство.

О спомнутим бешедовали директорка Покраїнского заводу за ровноправносц полох Диана Миланович, котра визначела важносц препознаваня насилства у фамилиї, и членїца „Мрежи СОС Войводини” Ивана Залич, котра бешедовала о файтох насилства у фамилиї, та о способох помоци поєдинцох и дружтва жертвом насилства.

Спред локалних инстуцийох значних за ришованє того дружтвеного проблему бешедовали директор Центру за социялну роботу „Солидарносц” Мирослав Бунєвачки и Ґоран Павлович спред Полицийней станїци Жабель, котри винєсол  приклади з роботи на терену, односно о присутносци насилства над женми у жабельскей општини.

На сходзе бешедовал и предсидатель Општини Жабель Чедомир Божич, котри визначел обвязку шицких же би „нє обрацали главу” од того проблему, алє и важносц превентивного дїлованя и помаганя жертвом насилства.

Покраїнски завод за ровноправносц полох спомнуту кампаню отрима у седем городох и општинох у Войводини.

5-Zabelj-02

ПОВЯЗАНИ ТЕКСТИ