Тройо керестурски школяре ше пласовали на Републичне змаганє

автор маф
1.1k Опатрене

ЗОМБОР – Шицки тройо школяре рускокерестурскей ОШ „Петро Кузмяк” котри участвовали на Окружним змаганю – Леонела Цифрич, Иван Рац и Даяна Рац, як и єден школяр зоз Зомбора – буду представяц Заходнобачки округ на Републичним змаганю „Цо знаш о транспорту”, цо  дотераз найвекши успих з тей обласци у историї керестурскей Школи.

Окружне змаганє отримане 7. мая у Зомборе, дзе ше змагали 24-еро школяре у двох возросних категорийох зоз шицких школох Заходнобачкого округу. У Б катеґориї (10-12 роки) перша була Леонела Цифрич з 286 бодами (з 300 можлївих), а други бул Иван Рац з 283 бодами.

Даяна Рац у Ц катеґориї (13-15 роки) завжала друге место з 288 бодами, а спомедзи шицких 24-ох змагательох у виробку тесту посцигла абсолутно найвекше число бодох – 97 з можлївих 100, док перше место у тей катеґориї завжал єден школяр зоз Зомбора.

Попри дипломох и медальох, найлєпши змагателє достали и специялни награди – Леонела бициґлу, а Иван и Даяна по таблет. Керестурски школяре ше за змаганє пририхтовали три мешаци зоз своїм наставнїком Технїчного и информатичного образованя Зденком Шомодїйом.

По правилнїку змаганя, на Републичне ше пласую найуспишнєйши хлапец и дзивче з обидвох катеґорийох, а тогорочне будзе 20. и 21. мая у Беоґрадзе. Керестурски школяре ше там буду змагац з побиднїками з 25 округох у Сербиї.

Найуспишнєйши школяр и школярка у обидвох категорийох на Републичним пойду на Евопске змаганє, хторе у септембру будзе у Праги, у Ческей.

ПОВЯЗАНИ ТЕКСТИ