НОВИ САД – На Медзинародним сайме туризму у рамикох „ЛОРИСТ”-у, на Новосадским сайме вчера участвовало и Туристичне здруженє (ТЗ) Руски Керестур – на штанду Туристичней орґанизациї Войводини, а як часц понукнуца Туристичней орґанизациї (ТО) Кула, хтора перши раз участвує на тим сайме.
Спред ТЗ Руски Керестур Наталия Емеди и Ксения Варґа з рижнима сувенирами, єдзеньом, домашнїма продуктами и брошурами представели понукнуце и туристични потенцияли Руского Керестура, як цо то Катедрална церква, етно-хижа, Замок и Водица, та „Днї керестурскей паприґи” и „Червена ружа”.
Директор Туристичней орґанизациї Кула Владимир Станкович гварел же тот город и кулска општина ма туристични потенцияли, а на тогорочним „ЛОРИСТ”-у ТО од стреди по вчера представела и Винарию Милисавлєвич, а свою роботи ище представя и жени зоз Сивцу.
ТО орґанизация Кула за Саям порихтала и промоцию нового филму туристичного понукнуца Кулскей општини.