Убудуце место примацого – велька матура

автор зам фото плт
772 Опатрене

БЕОҐРАД – Министер просвити Младен Шарчевич гварел же пред тижньом од Националного совиту за високе образованє достате позитивне становиско о уводзеню велькей матури, хтора би заменєла примаци испити на факултетох. По такей системи вельку матуру перши буду покладац терашнї школяре другей класи штреднєй школи, на концу школского 2018/19. року, преноши „Политика”.

По „Стратеґиї розвою образованя Сербиї по 2020. рок”, примаци испити за факултети заменї велька матура, и то обща, фахова, лєбо уметнїцка, зависно од штреднєй школи.

З покладаньом общей матури – за ґимназиялцох – здобудзе ше право упису на шицки високошколски установи без покладаня примацого испиту (винїмок буду лєм студийни ґрупи хтори вимагаю окремни способносци/таланти, як уметнїцки).

Фахова матура – за школярох штреднїх фахових школох – оможлїви право упису на матични дисциплини, а уметнїцка матура – за школярох уметнїцких школох – оможлїви преходносц на уметнїцки факултети.

З тоту идею ше сце змоцнїц ґимназиї по числу и квалитету школярох – же би тота форма образованя була главна за будуцих студентох, док штреднї фахово школи задумани так же би ше после їх законченя могло робиц.

ПОВЯЗАНИ ТЕКСТИ