ЗАҐРЕБ – У орґанизациї Представителя рускей националней меншини Городу Заґреб мр Иринея Мудрого всоботу, 26. новембра, отримани Културно-забавни вечар Руснацох Заґребу и Дзень Представителяа Руснацох Заґребу, як векши сход Руснацох у главним городзе Горватскей – же би ше медзисобно упознали, дружели, чули руски шпиванки и затанцовали руски танци, алє и же би ше Руснацох представело ширшей дружтвеней заєднїци.
Медзи госцами Представителя Руснацох Заґребу всоботу на тим вечаре були руководитель Оддзелєня за национални меншини Городу Заґреб и висланїк городоначалнїка Милана Бандича Желько Занинович, политични структури националних меншинох Заґребу – подпредсидатель Координациї националних меншинох Городу Заґреб и Представитель Болгарох Заґребу Рашко Иванов, предсидатель Ради мадярскей националней меншини и секретар Координациї радох и представительох меншинох Заґребу Золтан Балаж Прия, Представителька русийскей меншини Заґребу Ґалина Ковачевич, Представителька польскей медншини Заґребу Валентина Лончарич, як и Представитель италиянскей меншини Заґребу Оскар Арлант.
Як окреме милого госца, мр Ириней Мудри всоботу у Заґребу привитал и предсидателя Националного Совиту Руснацох у Сербиї Славка Раца, зоз супругу.
На програми тиж окреме привитани и член Совиту за национални меншини Републики Горватскей (РГ) Звонко Костелника, котри и секретар Союзу Русинох РГ, подпредсидателька Координациї Руснацох РГ и Представителька Руснацох у Осиєцко-бараньскей жупаниї Агнетка Балатинац, грекокатолїцкио священїк з Петровцох о. Владимир Седлак, котри источашнє бул и висланїк крижевского владики кир Николи Кекича, та предсидателє културно-уметнїцких дружтвох з Петровцох и Заґребу.
Културну часц тогорочней програми пририхтало КУД „Яким Гарди” з Петровцох, так же участвовали фолклорна, шпивацка и музична секция КУД, а потим присутних забавял оркестер „Микс бенд” з Руского Керестура.
Популарно волани Бал Руснацох Заґребу отримани у за тоту нагоду ушореней сали Ресторану „Казабланка”, попри Руснацох зоз Заґребу були и Руснаци з других местох, а того року було и красне число младих и дзецох.