РУСКИ КЕРЕСТУР –Того викенду наш Руски народни театер „Петро Ризнич Дядя„ остал без ище єдней драгоциней и милей особи. Нєшка пред поладньом упокоєла ше Ана Дудаш, шицким театралним ентузиястом познатша як „тета Ганчаˮ, ґлумица и длугорочна ґардероберка у тей нашей институциї.
Народзела ше 23. авґуста 1936. року у Руским Керестуре, дзе закочела основну школу, а потим ше преселєла зоз фамелию до Зомбора дзе ше школовала и жила по 1953. рок, кед ше врацела до Керестура, у котрим жила по конєц живота зоз своїм супругом, длугорочним директором нашого Театра-Владимиром Дудашом.
З театралну дїялносцу ше занїмала од самих початкох снованя Театра, дзе на Керестурскей сцени зазначела велї значни улоги за хтори достала награди, медзи другима и Златну плакету за найлєпшу улогу у представи „Опера за три ґроши„ Бертолда Брехта на Союзним фестивалу у Требиню.
Шицки актере у нашим театру ю окреме буду паметац по єй велькей любови и ентузиязму зоз хторим креировала и старала ше о ґардероби за велї представи Керестурскей сцени.
Ана Дудаш будзе похована на керестурским теметове на пондзелок, на 10 годзин, пре позарядови стан у кругу єй найблїзших.