Умарла Мелания Планчак (1954-2015)

автор зам
1.4k Опатрене

РУСКИ КЕРЕСТУР – После кратшей чежшей хороти, стреду, 16. децембра вноци, у 62. року живота умарла позната рускокерестурска фотоґрафка Мелания Планчак, власнїца Фото-студия „Планчак”.

Планчакова народзена 6. новембра 1954. року у Руским Керестуре, дзе и препровадзела свой животни и роботни вик. По законченю штреднєй тарґовецкей школи єден час робела як тарґовкиня, а концом 80. рокох прешлого вику ше почала занїмац з фотоґрафию и видео-знїманьом, цо пошвидко постала єй главна професия.

Вєдно зоз сином Владом основала Фото-студио „Планчак” и од початку 90. рокох була єдна з главних фотоґрафкох и знїмателькох шицкого цо ше збувало у Руским Керестуре и вообще медзи Руснацами, алє и ширше, понеже робела и у Кули, Вербаше, Коцуре, робела и у местох дзе жиє словацка национална меншина и других.

Фотоґрафовала и знїмала шицко – од приватних збуваньох значних за фамелиї, та прейґ шицких других у дружтвеним, образовним, културним, церковним, спортским и привредним живоце Керестура, так же прейґ фотоґрафиї и видео-знїмкох, як и скорейших керестурских фотоґрафох, и єй робота на одредзени способ доприноши терашньому и будуцому архивованю и историї Руского Керестура.

Окреме добре познала нашо звичаї з рижних нагодох, як цо то свадзби, так же и у тей часци допринєсла очуваню, як и одредзеному осучасньованю свадзебного протоколу. Пре єй наисце вредну, точну и нєсебичну роботу, у Керестуре и ширше велї ю познали под назвиском „Фото Тета”.

Мелания Планчак була и членїца Здруженя ремеселнїкох и приватних привреднїкох Керестура, а зоз своїма фотоґрафиями и знїмками збуваньох и части спонзор рижним орґанизацийом.

Похована є вчера, 17. децембра на керестурским теметове, а на остатню драгу ю випровадзели штирме священїки з Руского Керестура и Кули, як и числени Керестурци и єй почитователє з других местох. За собу зохабела супруга, сина, нєвесту и двойо унучата. Най єй будзе вична памят.

ПОВЯЗАНИ ТЕКСТИ