НОВИ САД – После длугей и чежкей хороти пияток, 15. мая, у Ветернику умар Дюра Пап, длугорочни новинар и редактор “Руского слова” и єден з наших найпознатших фаховцох у аґраре.
Дюра Пап народзени 17. априла 1945. року у Руским Керестуре дзе закончел и основну школу. После законченей штреднєй польопривредней школи уписує Польопривредни факултет у Беоґрадзе на котрим дипломовал 1972. року.
Роботни вик у новинарстве Дюра почал у Радио Новим Садзе, програми на руским язику вєшенї 1973. року, а од фебруара идуцого року прешол до „Руского слова”, дзе робел по авґуст 2011. року кед пошол до пензиї.
У „Руским слове” робел скоро на шицких рубрикох, алє його найвекше доприношенє було на бокох польопривреди. Тоти боки були нє лєм информативни, алє и поучни, бо давал совити преверених фаховцох у аґраре и искуства польопривредних продуковательох. Дюра бул пейц роки и главни и одвичательни редактор Календара (од 1996. по 2000. рок).
Дюра Пап и єден зоз сновательох Дружтва аґрарних новинарох Войводини (ДАН), и бул длугорочни подпредсидатель того Дружтва. През активносц ДАН Дюра провадзел и преношел читачом нови знаня, тренди и технолоґиї у аґраре, та розвой польопривреди у жемох транзициї, алє тиж так и искуства найрозвитших жемох у тей обласци з Данскей, Голандиї, Австриї… Вельке припознанє за аґрар було кед вон, вєдно з предсидательом ДАН, участвовал на 52. IFAJ (Шветовим конґресу аґрарних новинарох) у Ґрацу, у Австриї, 2008. року. Теди новини „Руске слово” и Руски календар ше нашли на полїчки того Конґреса дзе представени виданя з цалого швета.
Його упарта и квалитетна робота у информованю у тей обласци корунована з двома наградами. Здруженє културних творительох Сербиї „Завичай” и медзинародни фестивал новинарох котри провадза валал и польопривреду 2010. року додзелєли му специялну награду за обявени тексти у „Руским слове”. З нагоди ювилея, 75. Медзинародного польопривредного сайма у Новим Садзе, додзелєна му Награда Новосадского сайма за длугорочне провадзенє тей нашей найвекшей манифестациї у польопривреди.
У рамикох нашей култури Дюра бул ґлумец-аматер у забавох („Ревизор”, „Остац у себе”, „Жовта”) и у даскелїх радио-драмох на Радио Новим Садзе, а тиж так бул вецей роки ґлумец у емисиї „На габох музики и гумору”. На „Червеней ружи” и на других културних манифестацийох водзел конферанси. Дюра сотрудзовал и з другима медиями.
За Дюром остали супруга, два пристановени дзивчата и унучка. Хованє будзе на пондзелок, 18. мая на 12,45 годзин на Городским теметове у Новим Садзе.