ЗАҐРЕБ/ПЕТРОВЦИ (ГОРВАТСКА) – Всоботу, 31. октобра, у шпиталю у Заґребе у 68. року живота умар священїк о. Йоаким Дудаш, родом з Петровцох.
Йоаким Дудаш народзени у Петровцох 27. фебруара 1948. року, а по школованю, за священїка го пошвецел надвладика Гавриїл Букатко 27. юлия 1975. року у Вуковаре.
Службовал як капелан у Руским Керестуре, а потим велї роки бул у Македониї, у Новей Маали. О. Дудаш барз заслужни за духовни рост и розвой македонских грекокатолїкох, а велїх нєшкайших священїкох з Македониї, як духовнїк провадзел на драги ґу священству. Єден час службовал и як духовнїк у Фулди, у Нємецкей, праве за македонских богословох на Восточним институту.
Кратши час бул и капелан у Иванкове при Винковцох, у римокатолїцким Дяковско-осиєцким надвладичестве, а потим 2005. року приходзи за пароха до Петровцох. Но, пре очежани здравствени стан, 2009. року пошол до пензиї. Перши роки як пензионер пребувал у манастире шестрох василиянкох у Осиєку, а остатнї роки жил у Каритасовим доме за старих у Вербовцу коло Заґребу.
Попри своєй духовней роботи, о. Йоаким Дудаш останє запаметани и по своїх написох у Християнским календаре и дзепоєдних других публикацийох.
Хованє о. Йоакима Дудаша будзе нєшка, 2. новембра у Петровцох на 11 годзин, а обряд у петровскей церкви будзе предводзиц владика крижевски кир Никола Кекич, у сослуженю з вецей священїками. По обряду у церкви, о. Дудаш будзе поховани на теметове у своїх родних Петровцох.