Умар подобови уметнїк Янко Чижмар

автор ипа/зам
1k Опатрене

НОВИ САД/ҐОСПОДЇНЦИ – У Новим Садзе 2. новембра, у 88. року живота, умар наш познати подобови уметнїк Янко Чижмар, а будзе поховани нєшка, 4. новембра на 13 годзин у Ґосподїнцох.

Янко Чижмар народзени 10. марца 1929. року у Руским Керестуре, а кед мал три роки, з оцом ше преселєл до Ґосподїнцох, дзе роснул и ходзел до школи. Потим жил и робел у Новим Садзе.

Роками бул присутни у подобовим живоце Руснацох, алє и у подобових кругох Нового Саду, Войводини и Сербиї. Мал вецей самостойни вистави у Новим Садзе (коло 10), Ґосподїнцох (5), Руским Керестуре (2), Жаблю, Дюрдьове, Беоґрадзе, Чачку, Суботици, а участвовал и на вецей колективних виставох. Бул член Здруженя подобових уметнїкох-аматерох Нового Саду и Клубу подобових уметнїкох Дружтва за руски язик, литературу и културу.

За свою подобову творчосц достал вецей припознаня, медзи хторима и награда за линорез на рочней смотри подобових аматерох Сербиї у Суботици. Заступени є у моноґрафийох „Подобова творчосц Руснацох” (2003) и Подобова колония „Стретнуце у Боднарова“ (2015), хтори видало Дружтво за руски язик, литературу и културу у Новим Садзе.

На чесц 80-рочнїци народзеня Янка Чижмара у децембре 2009. року, у рамикох 19. Манифестациї „Днї Миколи М. Кочиша”, у Ґосподїнцох була отворена подобова вистава на хторей були виложени 34 Чижмарово роботи, насампредз пейзажи, по чим бул и найпознатши и краша велї нашо установи, а иста вистава рок познєйше обишла и вецей нашо места.

Най му будзе вична слава и подзекованє.

ПОВЯЗАНИ ТЕКСТИ