КРИВАНЇ (СЛОВАЦКА) – Самим концом прешлого мешаца, 30. авґуста, у 95. року живота у пряшовским шпиталю умар познати фолклориста и етноґраф Ян Лазорик, зоз Криваньох у Шаришу.
Ян Лазорик народзени 29. септембра 1920. року у Криваньох и цали живот зазберовал и записовал народни традициї, обичаї, фотоґрафиї, рижни предмети, народни присловким мудросци и приповедки, шицко цо вязане за дакедишнї живот предкох у реґионє Горнєй Тиси, так же дзекуюци и йому, шаришски край постал познати як шедзиско народней традициї и култури. Бул залюбени до народней традициї и, як з нагоди його упокоєня записали словацки новини „Корзар”, фанатично звладал народни диялекти, музику, архитектуру и традицийни фолклор.
Назберане записовал, обрабял и поставял на сцену, обявйовал у периодики, алє и у кнїжкох, як цо то „Нашо традицийне чобанство”, „Жиц значи бешедовац” и други, на основи його материялох зняти аж и филми. Основал и найпознатшу манифестацию у його реґионє – Горньоториски фестивал, хтори того року отримани 22. раз, алє без свойого зачатнїка и порядного провадзача, понеже го звладала хорота и умар два тижнї по отримованю Фестивалу.
Остали за нїм тисячи боки рижного позбераного материялу, предмети, артефакти, богате духовне нашлїдство хторе историчаром, етнолоґом и етноґрафом послужи за дальши виглєдованя и записованя надорного скарбу народох у Словацкей.
Лазорик познати и Руснацом у Сербиї, насампредз фолклористом, алє и ширшей публики, понеже од 2014. року на репертоаре Руского народного театеру „Петро Ризнич Дядя” представа „Береме ше – так нам и треба”, витворена по мотивох з Лазорикового сериялу „Опатьце”, у копродукциї з коцурску КУД „Жатва”.
У Словацкей и ширше почитовани фолклориста и културни роботнїк Ян Лазорик поховани у Криваньох 2. септембра, а комеморация отримана у месним амфитеатре.