РУСКИ КЕРЕСТУР/ОЛОМОУЦ – На нєдавно отриманей „Tattooˮ конвенциї, односно Сайму тетоважох, у городзе Оломоуц у восточней Републики Ческей, участвовал и Славо Палєнкаш родом зоз Руского Керестура, чийо уметнїцки рисунки на пилкох представяли награди за найлєпших 33-ох „tattoˮ майстрох на тим змаганю.
Як гварел Славо, до сотруднїцтва пришло кед го прейґ дружтвеней мрежи Фейсбук контактовал орґанизатор спомнутей манифестациї, и предложел же би його пилки, хтори першенствено и були наменєни за декор „tattooˮ салонох, представяли дарунок найлєпшим учашнїком у правеню тетоважох. Рисунок на пилкох представя защитни знак тей манифестациї, а рисовани є зоз шлєбодну руку автора.
На манифестациї кажди „tattoˮ майстор, односно „tattooˮ студио, мал по єдного учашнїка хторого тетовирал, а на концу жири, у каждей од 10 катеґорийох, додзелєл награди за перши три найлєпши тетоважи.
На Сайму тетоважох участвовали 100 учашнїки зоз пейцох жемох, а нажаль, автор рисункох нє присуствовал спомнутей „Tattooˮ конвенциї пре актуалну епидемию з вирусом Ковид-19.