БЕОҐРАД – До єдинственого виберацкого списку (ЄВС) уписани 7.000.095 гласаче, сообщене вчера, 8. марца, у Министерству державней управи и локалней самоуправи.
З того Министерства надпоминаю же ше припаднїки националних меншинох маю право уписац до ЄВС на кирилки, а потим и на писму своєй националней меншини, як и же у тей хвильки у ЄВС єст 206.820 гласаче хторим двояк записани податок о мену и презвиску.
Гражданє з правом гласа можу на сайту www.birackispisak.mduls.gov.rs преврериц чи су уписани до ЄВС, кед кликню на банер „Провера уписа у jединствени бирачки списак”. Треба написац и єдинствене матичне число и повториц сиґурносни текст зоз слики.
Кед же даєден граждан нє уписани до ЄВС, а здобул полнолїтство после заключеня ЄВС, односно 15 днї пред виберанками, општински и городски управи обовязни од хвильки кед ше розпише виберанки, шицки особи хтори наполня 18 роки з дньом отримованя виберанкох, уписац до виберацкого списку.
Кед же граждан хтори постал полнолїтни утвердзи же општинска лєбо городска управа тото нє зробела, треба же би ше з особну карточку лєбо виводом з матичней кнїжки народзених обрацел општинскей управи по месту пребуваня и вимагал же би бул уписани до ЄВС.
Гласаче хтори по месту пребуваня у иножемстве можу найпознєйше пейц днї пред заключованьом ЄВС, а то 2. април, прейґ дипломатско-конзуларного представнїцтва Републики Сербиї поднєсц вимогу же би ше их уписало до списку и же би на наиходзацих виберанкох за народних посланїкох могли гласац у иножемству.