НОВИ САД – Управни одбор (УО) Заводу за културу войводянских Руснацох стреду, 21. януара, на електронскей схадзки єдногласно прилапел План и програму роботи и Финансийни план за 2015. рок. На порядней схадзки у децембру, УО начално розпатрал спомнути документи, хтори тераз кориґовани и дефиновани.
Так буджет Заводу за тот рок виноши 6 милиони 600 000 динари, з чого за програмски активносци буду унапрямени 3 милиони 450 000, за роботу Заводу 3 милиони 390 280, а наменски средстава 944 00 динари.
Медзи векшима програмскима активносцами буду преклади и видаванє кнїжкох и моноґрафийох, публикованє каталоґох и орґанизованє вистави „Шицко то оглашки и реклама”, троязична моноґрафия и ДВД виданє „Народне облєчиво и танци бачванско-сримских Руснацох”, музичне ЦД виданє „Ruthen World”, Фахова помоц нашим КУД-ом и друге.
У тим року наявене и отримованє заєднїцких роботних схадзкох и консултацийох Националного совиту Руснацох, Заводу за културу войводянских Руснацох и „Руского слова” о дальшей координациї и можлївосцох за нови заєднїцки способи ришованя двох найзначнєйших и найвекших проєктних активносцох Заводу – Централну преславу Националного швета и способу финансованя КУД, цо и надалєй треба потримовац, змоцнїц и афирмовац, сообщене зоз Заводу.