РУСКИ КЕРЕСТУР – Штредком того мешаца атлетичаре рускокерестурскей Школи „Петро Кузмяк” участвовали на двох окружних змаганьох – за штредньошколцох и основношколцох, на хторих знова посцигли замерковани резултати.
На Окружним змаганю у атлетики за штреднї школи, хторе 13. априла отримане у Зомборе, Антония Монар у скаканю до висока освоєла друге место, з прескочену висину 1,40м, а Валерия Ковач у скаканю до далєка завжала треце место, зоз скоком од 4,46 метери.
Окружне змаганє у атлетики за основни школи отримане 19. априла, а млади атлетичаре ше змагали у трох катеґорийох – школяре од першей по штварту, школяре 5. и 6. класи и школяре 7. и 8. класи, а керестурска школа мала змагательох у остатнїх двох катеґорийох.
У конкуренциї школярох шестих класох Никола Накич освоєл перше место у скаканю до висока, з прескочену висину 1,40м и пласовал ше на Медзиокружне змаганє.
У катеґориї шестей класи Тони Пашо у руцаню кулї освоєл треце место з доруцену кулю на 10,66м, а Неманя Стойков у обегованю на 60м тиж освоєл треце место, з резултатом 8,60 сек. Штафета на 400м школярох 6. и 7. класох освоєла друге место, а творели ю Иван Рац, Неманя Стойков, Дарко Надь и Алекса Шайтош.
У катеґориї школярох седмих и осмих класох на Окружним першенстве Кристина Катона у скаканю до висока освоєла друге место з прескочену висину 1,45м, а Тереза Будински друге место у скаканю до далєка, з доскоком на 4,46 метери.
Медзиокружне змаганє, на хторим участвує Никола Накич, будзе 5. мая у Новим Садзе.