РУСКИ КЕРЕСТУР – У орґанизациї Здруженя ремеселнїкох и приватних поднїмательох и Здруженє женох „Байка” з Руского Керестура, а з финансийну потримовку Покраїнского секретарияту за польопривреду, водопривреду и лєсарство и Општини Кула, у Керестуре всоботу, 25. юния, у дворе и коло Майсторского дому у центре Керестура отримани Шести Керестурски саям. У мено орґанизаторох Саям отворел предсидатель Здруженя ремеселнїкох Владимир Емейди.
Тогорочна привредно-туристична манифестация була пошвецена старим ремеслом, з мотом „Най ше нє забудзе”, так же векшином старши, пензионовани керестурски майстрове, попри алату, и „на живо” представели свою роботу – ковалє Яким Канюх Янчийов, Яким Пап Папянков и Михал Надь Митьов, колєсаре-тишлїре Михал Надь Митьов, Яким Кренїцки и Владимир Малацко, як и младши майстрове-кломфере Владимир и Любомир Сопково.
Попри спомнутих, у дворе Майсторского дому були виложени алати и продукти штранґара, сияртова, брусара, а кухарки Мария Малацко и Ирина Сакач за учашнїкох Сайму и других у котлох варели сладку капусту и живински паприґаш з цестом.
Ковалє пред нащивителями, насампредз школярами трецей и штвартей класи керестурскей ОШ, подковали и коня, котрого за тоту нагоду приведол предсидатель Конїцкого клубу „Русин” Желько Папуґа.
Майстрове Михал Надь и Яким Кренїцки указали як ше реже древо з крижну и двойнїсту пилу, майстор Михал Надь оштрел и ножи на векшим водовим брусу, медзи иншим, Малацко указал як ше правело и оправяло пориска за глобенє. Школяре и други нащивителє ше и сами могли опробовац у пилєню древа, обрацаню брусу, як и резаню плеху при кломферох.
Попри представяня старих ремеслох, опрез и коло Майсторского дому були и коло 20 штанди з продуктами рижних здруженьох и привреднїкох з Керестура, Шиду, Коцура, Кули, Суботици, Бачкей Тополї и Петроварадину, а пополадню преглашени и найлєпши колач на грубо з маком.
За змаганє колачи приявели штири жени – Мария Макаї, Мария Планчак и Тереза Пашо з Керестура и Анка Драґоєвич з кулского Здруженя женох „Идея”, а осемце хлопи, як жири, за найлєпши на грубо з маком преглашели колач Терези Пашовей.
Саям тирвал до пополадню, а орґанизовано го нащивели и 17 жени зоз Суботици, як и екипа ТВ-емисиї на сербским язику „На двох колєсох през Войводину” Радио-телевизиї Войводини.
„Рутенпрес” того тижня на своїм сайту обяви и окремну фото-ґалерию з Керестурского сайму.