НОВИ САД – Покраїнска влада на вчерайшей схадзки утвердзела предлог ребалансу буджету Войводини за тот рок, по хторим цалосни буджет будзе 59,9 милиярди динари, цо за 1,72 милиярди вецей у одношеню на буджет прилапени у децембру прешлого року – сообщене з вчерайшей схадзки Покраїнскей влади.
Як поведзене, предложени ребаланс вираз ревидированих оценох приходох и приманьох, утвердзеного звишку приходох по прилапйованю закончуюцого рахунку за 2015. рок и пренєшених средствох з предходних рокох.
Ребаланс предложени и пре подполне витворенє прилапених явних политикох, явних потребох и активносцох, як и пре видвойованє средствох за нови проєкти хтори би мали буц реализовани до конца фискалного рока.
Зоз схадзки Покраїнскей влади сообщене и же цалосни фискални дефицит утвердзени у виносу од 3,11 милиярди динари и у подполносци є покрити з пренєшених средствох.
На вчерайшей схадзки принєшени и ришеня о менованю руководительох у дзепоєдних покраїнских здравствених и социляних установох, а Министерству транспорту будзе предложене же би ше пролонґовало инициятиву о преношеню власнїцтва над гайзибанску инфраструктуру на Войводину и локални самоуправи, як и же би ше дзепоєдни реґионални гайзибански драги у Войводини видзелєло з того преношеня правох.
Нєшка, 15. септембра, будзе отримана пията схадзка Скупштини АПВ, а медзи иншим, покраїнски посланїки буду одлучовац и о випатрунку и хаснованю символох Покраїни, а предложене же би ше, попри терашнїх, ровноправно хасновало и ткв. традицийни символи, односно традицийни герб и заставу АПВ.