Учиц за цали живот

автор тах
1.9k Опатрене

„Фаховци гваря же кед ше дацо учи и кед ши пририхтани же ци тото цо учиш будзе требац до конца живота, вец твой мозоґ иншак и памета тоту лекцию, бо зна же твой циль запаметац занавше, а кед ти себе уж напредок повеш же ци то будзе требац лєм по контролни, вецка ше то швидше и забудзе” – гвари Славица Байор, директорка коцурскей основней Школи.

Вельо раз школяре кед уча даяку лекцию, уча ю лєм за одвитованє або за контролни, и после того ю забуду, як кед би им нїґда вецей нє требала. Кед школяре уж у пиятей класи знаю же им даяка часц ґрадива будзе требац за закончуюци испит, вец тото лєпше и длужей паметаю, нє уча лєм за контролни або за одвитованє, алє уча же би тото знанє було тирвацше, понеже знаю же го ознова буду мушиц даґдзе репродуковац.

Школяре ше, практично, уж од пиятей класи пририхтую за закончуюци испит, а як гвари директорка Байорова за нїх лєпше же би мали циль и же би знали же им тото цо уча будзе ище дараз требац.

Slavica Bajor– Примаци испит ма три часци, мацерински язик, математику и комбиновани тест. На комбинованим тесту облапена история, ґеоґрафия, хемия и физика, так же шицки тоти наставнїки шедли и вєдно ше догварели же кеди хто будзе тримац пририхтуюцу наставу. Направели розпорядок же би ше нє случело же у исти час школяре маю годзини з двох предметох. Кажди наставнїк обвисцел школярох кеди будзе пририхтуюца настава – гвари Байорова.

Проблем же нє шицки школяре приходза на пририхтуюцу наставу, а за нїх би було добре же би поряднє приходзели, бо тота настава пре нїх орґанизована. Годзини обовязни, алє ше нє водзи евиденцию, и школяре нє доставаю нєоправдану годзину кед нє приду, та прешлих рокох було школярох хтори нє приходзели поряднє. Попри тим, єст и школярох хтори обчекую же годни шицко научиц на тей пририхтуюцей настави, алє то нє так.

– Школяре треба же би и дома вежбали зоз збиркох цо маю за пририхтованє, и вец тото цо им нє ясне, наставнїк им розтолкує на пририхтуюцей настави, бо нє мож на пририхтуюцей настави шицко до деталя толковац, пририхтуюца настава ту лєм же би наставнїк потолковал школяром тото цо им нє ясне, и тото цо им идзе чежше. Думам же школяром нє потребни приватни годзини попри тих пририхтуюцих годзинох у школи. На интернету, поведзме, маю тести хтори можу робиц, и такой достаню резултати же цо поробели добре, цо нє. Значи, можу на вецей способи дойсц до добрих резултатох, лєм кед су стварно заинтересовани шеднуц, виглєдовац и учиц – гварела Байорова.

ЯК ШЕ ШКОЛЯРЕ ПРИРИХТУЮ

– Почала сом ше пририхтовац, робим задатки зоз збиркох цо зме достали и учим шицко. Ходзиц и на пририхтуюцу наставу, а плановала сом и приватни годзини зоз математики, бо ми тото дакус нє идзе, та попри того цо учиме у школи, ище дополнїм пририхтованє. Математика ми будзе найчежша, ту єст вельо формули хтори мам запаметац, а и история, пре паметанє рокох. Найлєгчейша ми будзе биолоґия, бо то любим, и пачи ше ми. Ище нє знам на цо ше упишем, алє сиґурно будзе штиророчна школа – гварела Марта Малїк.

DSC_0187– Почали зме ше помали пририхтовац у школи, а дома ше намагам кажди дзень голєм дакус учиц. Тераз були змаганя, та сом ше баржей на нїх фокусовала, алє углавним робим задатки зоз збирки з дня на дзень. Приватни годзини нє будзем брац, нє так любим кед ми дахто помага, волїм сама посцигнуц дацо и научиц, та и кед би то нє було досц, знова бим ше цешела, бо би то бул лєм мой успих за хтори сом заслужна. Кед у питаню примаци, думам же будзе вельо нервози и же будзе дакус напарте, алє нє думам же будзе таке барз чежке. Сцела бим ше уписац до медицинскей, а нє сиґурна сом ище. Нє розумим чом ше при упису нє будзе раховац боди зоз змаганьох. Я думам же школяром тоти боди були мотив же би вецей учели, а тераз нє буду мац мотив за змаганє. И я тераз кед була на руским и на сербским язику на змаганю, та ми так шицко єдно було чи освоїм даєдно место, праве прето – гварела Марияна Мали.

– За примаци зме ше уж шицки почали рихтац, пошвидко будземе мац и пробни примаци же бизме видзили як то шицко ма випатрац, а и пририхтуюци годзини почали. Особнє нє ходзим на приватни годзини. Учим и сама дома, та озда ми будзе досц за добри успих. Найвецей ше боїм од математики, гоч сом одлични школяр. Тоти задатки зоз збирки нє випатраю таки чежки, алє заш лєм мушим учиц. Я ше жадам уписац до ґимназиї, лєм ище нє знам чи сцем путовац кажди дзень, чи пребувац даґдзе – гварел Марко Буила.

– Зоз пайташами вельо бешедуєме о примацим, а тиж так и о тим же дзе ше предлужиме школовац. Вельо нам помагаю и совитую нас наставнїки. Я ше уж почал пририхтовац, по збиркох сом розпатрал задатки, тераз зме, наприклад, мали змаганя з руского и сербского, та сом и тоти тести опатрал. На пририхтуюци годзини ходзим, алє на приватни годзини нє будзем ходзиц. Думам же ми тото цо научим у школи и дома будзе досц. Найвецей уваги пошвецим рускому и математики, а тот комбиновани тест ми ше видзи лєгчейши, питаня ми таки лоґични. Школованє бим сцел предлужиц у технїчней школи „4. юлий” у Вербаше, на транспортним напряме – гварел Давид Кулич.

– Зоз розпорядком пририхтуюцих годзинох хтори нєдавно направени зме почали од того тижня, так же кажди предметни наставнїк ма свой термин през тидзень, а я як наставнїк руского язика ше мам з дзецми находзиц раз до тижня. Попри тих пририхтуюцих годзинох, ми тиж так и порядни годзини руского максимално хаснуєме на пририхтованє за закончуюци испит. Мнє ше особнє видзи же то шицко барз обсяжне и напарте за дзеци, алє думам же ше до половки юния усвої тото ґрадиво хторе ше ма найсц на испиту – гвари Снежана Шанта, наставнїца руского язика.

ФАХОВЦИ О ЗАКОНЧУЮЦИМ ИСПИТУ

Терашнї школяре досц шлєбоднєйши, поровнуюци их зоз прешлима ґенерациями, гвари Мария Сакач-Фейса, педаґоґиня у коцурскей Школи. Дзепоєдни школяре цо маю през цали рок трему, та ю маю и на закончуюцим испиту. Гевти цо сцу добру оцену заробиц, та су у страху кед нє буду мац достаточно боди, же ше вец нє годни уписац до тей школи цо жадаю. Тераз будзе дакус иншак, бо школяре хтори буду мац менєй як 50 боди нє годни ше уписац до штиророчней школи. Гевти школяре цо нє були вредни през цали рок зоз тим на даяки способ буду покарани, бо нє годни уписац тоту школу цо сцели, алє лєм тоту цо можу.

Marija Sakac Fejsa, pedagog (2)– Думам же тоти закончуюци тести єдино зоз того боку позитивни же тераз школяре обновя шицке ґрадиво, та им будзе хасновац за штредню школу, да маю якишик початок. Особнє думам же би було найлєпше най ше ранґираю лєм на основу успиху, та би ше у цеку школованя строгше оценьовало и було би реалнєйше як цо то тото цо ше роби тераз зоз тима закончуюцима испитами. Скорей бим була за тото же би ше школяром таки типи задаткох давало през школованє, значи у контролних, писмених и усмених, яґод лєм на концу рока их витестовац. Значи нє лєм таки задатки, цо их напамят мож научиц, алє таки задатки за роздумованє, як цо то практикуєме у нашей школи уж єден час – гвари Сакач-Фейсова.

И школяре и наставнїки розчаровани же ше на закончуюцих испитох нє буду раховац боди зоз змаганьох. Ша, то исто вредзи, гвари Сакач-Фейсова и труд и успих, и час. То вшелїяк нє поправдзе. Вона дума же би ище требало и материялно наградзиц школяра и наставнїка хтори посцигню даяки успих на змаганю.

– Школяре хтори одлични и хторим важне же би ше образовали то озбильнєйше похопюю, и баржей ше пририхтую за закончуюци испит. За дакого испит то обтерхованє, а за дакого нє. То шицко завиши од дзецка, и од фамелиї, кельо их родичи прицискаю же би були одлични, же би посцигли цо лєпши успих. Тоти цо им важне їх образованє роздумую у тим напряме, а тоти школяре хтори анї у школи нє учели вельо, тому нє даваю вельку важносц. На концу, понеже ше за покладанє закончуюцого испиту достаточне на нїм лєм зявиц, дзецом то нє таке стресне. Значи, гоч маю нула боди, заш лєм прейду. Кому нє важне же до хторей школи ше упише, тому то нє велька бриґа – гвари Мариєта Буила, школски психолоґ.

 Нєшкайши осмаки свою улогу матурантох озбильно похопели, вони дибре знаю же су найстарши у школи, так же ше у тим барз добре знаходза, гвари Буилова. Школяре наисце информовани, а шицко цо нє знаю, знаю дзе можу найсц. Интернет добре средство же би ше дошло до информацийох, нє так як скорейши ґенерациї, пред, поведзме 10 роками. Теди школяре були дакус страцени, а тераз им шицко сервиране.

ДЗЕ ШЕ СЦУ УПИСАЦ КОЦУРСКИ ШКОЛЯРЕ

Marijeta Buila, psiholog (2)– Попри интересованьох, на вибор школох уплївує успих у школи, родичи, дружтво, финансийни фактори, значи чи маю можлївосц пойсц даґдзе далєй, чи муша буц ту у околїску. Медзитим, школяре у нашей школи ище вше нє знаю цо сцу уписац. Затераз найвецей интересованя при хлапцох єст за штредню технїчну школу „4. юлий” у Вербаше, а за дзивчата до ґимназиї, економскей и медицинскей школи. Даскельо з нїх ше интересує и за програмованє – гварела Мариєта Буила, школски психолоґ.

ПОМОЦ У ВИБЕРАНЮ ПРОФЕСИЇ

Кед у питаню вибор школох, школяре тераз маю нагоду робиц тести за професийну орєнтацию. Правда, нє у Коцуре, алє можлїве го задармо зробиц у Вербаше у Оддзелєню националней служби за обезпечованє роботи. Школяре можу самоинициятивно пойсц, у ґрупох ше тестираю, и вец маю индивидуалну бешеду, дзе дознаю резултати тестох. То велька помоц кед школяре нє знаю цо сцу уписац.

ПОВЯЗАНИ ТЕКСТИ