НОВИ САД – Новосадска власц пошвидко планує детально ушориц випатрунок и хаснованє ознакох Городу – гербу и застави, пише портал 021, понеже ше их, як гваря у городскей управи, у пракси виклада нєпримерано, часто и у погришних фарбох.
Нови Сад и нєшка хаснує герб хтори достал 1748. року, кед постал Шлєбодни кральовски город у Габзбурґшскей монархиї, односно заставу, хтора аж у прешлим вику достала терашню фурму. Медзитим, по нєслужбених информацийох, у Статуту Городу нєдоповедзена точносц символох и як ше их хаснує.
Так мож видзиц герб з часто погришнима фарбами и меншима вименками, при чим го хасную и приватни и физични особи, за цо нє маю дошлєбодзенє Городу.
Локална самоуправа нє ма ясни упутства, як цо подзаконски акти, хтори дефиную деталї вязани за хаснованє символох Городу та, як дознава 021, намира Городу оформиц окремну комисию, хтора би предложела ришеня випатрунку ознакох Городу и способи їх хаснованя.