НОВИ ПАЗАР – Предшедаваюци Координациї националних совитох (НС-ох) у Сербиї Сулейман Уґлянин вчера на конференциї за новинарох у Националним совиту Бошнякох виявел же потребне пременїц ревизию Акцийного плану за витворйованє правох националних меншинох у рамикох Поглавя 23 и од Влади Сербиї вимага ревизию того документу, пише Бета, а преноши РТВ.
Як потолковал, до Акцийного плану нє учишлєни значни предлоги националних совитох националних меншинох, же є нє розпатрани на Совиту за национални меншини на уровню держави, як и же у своїм змисту нє ма ключни обовязки держави спрам националних меншинох.
– Од Влади Сербиї вимагаме ревизию Акцийного плану, до хторого буду уключени и предлоги шицких меншинох. Тиж так, вимагаме же би ше з тим документом ясно дефиновало активносци хтори держава ма превжац, ношительох, термини и жридла финансованя за їх реализацию. Глєдаме и же би нови Акцийни план достал согласносц Совиту за национални меншини – гварел Уґлянин, котри и предсидатель Националного совиту Бошнякох у Сербиї.
На питанє же хтори то предлоги националних меншинох нє у Акцийним планє, одвитовал же нє зна конкретни з других националних совитох меншинох, алє же Национални совит Бошнякох дал аж 498, а як гварел, анї єден нє прилапени.
Тиж виявел же му нє познате чи до акцийних планох за поглавя 25 и 26, хтори прилапени на скупштинским Одборе за образованє, учишлєни и предлоги националних совитох националних меншинох.
На вчерайшей схадзки за новинарох предсидатель Координациї НС-ох гварел же тото цело упутело и вимогу за швидку схадзку з министерку державней управи и локалней самоуправи Ану Брнабич.