У Беоґрадзе нєшка починаю Днї рускей култури

автор зам
1.1k Опатрене

БЕОҐРАД – У Етноґрафским музею у Беоґрадзе нєшка, 15. авґуста, починаю Днї рускей култури и тирваю по 28. авґуст. У сотруднїцтве з Етноґрафским музейом, манифестацию орґанизує Завод за културу войводянских Руснацох.

Днї рускей култури у Беоґрадзе нєшка (на 13 годзин) буду отворени з виставу „Обряди преходох у фокусу обєктиву фотоґрафох Будинскових”, а у програми участвує и Хор „Гармония” з Нового Саду.

На штварток, 18. аґуста (на 18 г.), литературну творчосц Руснацох представя академик Юлиян Тамаш, Михал Рамач, Ирина Гарди Ковачевич и Микола Шанта. У програми участвую и рецитаторе Александра Лендєр и Александер Мудри, як и музичар Димитрий Цап.

На вовторок, 23. авґуста (на 18 г.), будзе представена моноґрафия „Танци бачко-сримских Руснацох”, о чим буду бешедовац хореоґрафе Йоаким Рац, Микола Ґубаш и Звонко Костелник, а свадзебни обичаї Руснацох прикажу члени КУД „Жатва” з Коцура. У музично-фолклорней часци участвую члени КПД „Карпати” з Вербасу и ансамбл Дому култури Руски Керестур.

Моноґрафия „Народне облєчиво бачко-сримских Руснацох” будзе представена на пияток, 26. авґуста (на 18 г.), о чим буду бешедовац етнолоґ мр Катарина Радисавлєвич и историчар-кустос Любица Отич, а у музично-фолклорней часци участвую члени КУД „Тарас Шевченко” з Дюрдьова. Плановане и пририхтованє етно-столу.

Днї рускей култури у Беоґрадзе буду закончени на нєдзелю, 28. авґуста (на 18 г.), з тематским вечаром „Наука и Руснаци – вчера, нєшка, ютре”. Преподаванє з тему „Руснаци у южней Угорскей/Югославиї” отрима др Янко Рамач”, предвидзена и музична часц, як и службене заверанє горе спомнутей вистави и Дньох рускей култури у Беоґрадзе.

Шицки програми буду отримани у просторийох Етноґрафского музею.

6-BGD-02

ПОВЯЗАНИ ТЕКСТИ