У Беоґрадзе нєшка представянє националних меншинох „Мозаїк Сербиї”

автор зам
904 Опатрене

БЕОҐРАД – З нагоди Медзинародного дня людских правох – 10. децембра – у Беоґрадзе нєшка будзе орґанизоване окремне представянє шицких 20 националних меншинох у Сербиї хтори орґанизовани прейґ националних совитох (НС) и Єврейскей општини. Представянє з назву „Мозаїк Сербиї” орґанизує  Канцелария за людски и меншински права Влади Републики Сербиї, у сотруднїцтве з националнима совитами националних меншинох.

То будзе перши раз же у Сербиї Медзинародни дзень людских правох будзе означени и з вельку манифестацию пошвецену припаднїком националних меншинох, хтори ше представя з културну програму, информативну, образовну и видавательну дїялносцу, як и зоз своїма националнима кухнями, народним облєчивом, старима ремеслами и другима змистами.

Руснацох на заєднїцкей културно-уметнїцкей програми буду представяц шпиваче и шпивацки ґрупи з КУД „Тарас Шевченко” з Дюрдьова, КПД „Дюра Киш” зоз Шиду и Женска шпивацка ґрупа „Бикичанки” з Бикичу, а на окремним штанду НВУ „Руске слово”, Завод за културу войводянских Руснацох, Основна и штредня школа з домом школярох „Петро Кузмяк” з Руского Керестура и здруженя женох „Байка” з Керестура и „Бикичанки” з Бикичу.

„Мозаик Сербиї”, як свойофайтови „саям” националних меншинох будзе у гали 3А Беоґрадского сайму од 10 до 16 годзин, а шветочне отверанє на 11 годзин.

Як наявене, з нагоди Медзинародного дня людских правох и представяня националних меншинох на Беоґрадским сайме, и популарна ТВ-емисия РТС „Жикина шареница” нєшка, 10. децембра, од 9 до 11 годзин будзе пошвецена меншином. У емисиї КУД „Тарас Шевченко” з Дюрдьова „на живо” виведзе єдну руску шпиванку.

ПОВЯЗАНИ ТЕКСТИ