ВЕРБАС – З кладзеньом венцох на памятнїки и спомин-плочи, як здогадованє на жертви у Другей шветовей войни, алє и других войнових зраженьох, у Вербаше пондзелок означени 4. юлий – Дзень борцох.
Як наводзи портал Општини Вербас, венци положени на чесц погинутому борцови Иси Секицкому на Липарскей драги, потим на Спомин-гробнїцу на Городским теметове, на памятнїк борцом котри погинули у войнох дзеведзешатих рокох, на памятнїк спаднутим борцом Червеней армиї, коло бисти Велька Влаховича и на памятнїк у центре городу.
Венци положели представителє Општини Вербас, СУБНОР-у, општинских орґанизацийох Сербскей напредней странки и Социялистичней партиї Сербиї и други орґанизациї, а централна шветочносц означованя Дня борца орґанизована у Бази „Центер” у Старим Вербаше.
Як наведзене, СУБНОР означи и 7. юлий – Дзень повстаня народох Сербиї, 13. юлий – Дзень повстаня народох Чарней Гори и 27. юлий – Дзень повстаня народох Босней и Герцеґовини.