ВЕРБАС – Всоботу, 4. априла, опрез Дому здравя ,,Велько Влахович” у Вербаше поставени шатор у котрим ше од тераз буду брац бриси за тестиранє на вирус корона.
Позберани материял будзе посилани на Институт за явне здравє Войводини, а резултати буду готови у периоду од 24 годзини. Двойо лаборанти вербаского Дому здравя закончели обуку за запровадзованє тей процедури.
Источашнє, у Общим шпиталю Вербас почало будованє нового, окремного уходу на Оддзелєнє за диялизу. Циль тей акциї же би ше пациєнти того оддзелєня додатно зачували од можлївосци ширеня коронавирусу.