РУСКИ КЕРЕСТУР – Нєшка, на Треци дзень Сошедствия св. Духа – Завитни дзень у нашим Марийовим святилїщу Водици, дзе ше обчекує приход числених паломнїкох з нашого Апостолского еґзархату, з других местох, як и з Крижевского владичества у Горватскей. На Архиєрейскей Служби Божей на 11 годзин, хтору будзе предводзиц апостолски нунций у Сербиї архиепископ Лучияно Сурияни з нашим владиком Георгийом, другима владиками обидвох обрядох и нашима священїками, буду и вецей значни подїї.
Як то длугорочна традиция, Завитни дзень почал вчера пред вечаром з процесию до Водици з крижами, хтора на 17 годзин рушела з церковней порти. У процесиї були прейґ 40 особи, а предводзели ю керестурски капеланє о. Владимир Медєши и о. Михайло Шанта, а з молитву шестри Служебнїци.
На 19 годзин у Водици була Архиєрейска Служба Божа, хтору предводзел помоцни Прешовски владика Милан Хаутур, а сослужели священїки о. Петер Лах, о. Марко Дурлак и о. Радован Андрейко зоз Словацкей, з домашнїм парохом о. Михайлом Малацком. Попри спомнутих домашнїх капеланох, споведал и старовербаски парох о. Алексий Гудак.
Владика Хаутур велькому числу пристуних и наказовал о вецей актуалних темох, а наглашел же ше ту, на тим святим месце треба модлїц за мир у душох, у фамелийох а потим и у швеце. Служба Божа закончена з молебеном пред водицову Лурдеску пещеру.
Нєшка, на Завитни дзень, владика Георгий Джуджар преслави и 15 роки як є пошвецени за владику, а Завитни дзень у Водици у ювилейним Року милосердия будзе одпустове паломнїцтво за вирних зоз шицких парохийох нашого Еґзархату.
Источашнє будзе преславена и духовна повязаносц Водици з папску базилику Мария Велька у Риме и заєднїцу Марийових святилїщох Католїцкей церкви. З тим Водица, у одредзених дньох, занавше достава можлївосц даваня подполного одпусту.
На Завитни дзень будзе отворени ювилейни, двастоти рок од першого обявеня у Водици (1817-2017).