У Войводини закончена диґитализация

автор ртв/ядю
799 Опатрене

НОВИ САД – Зоз уключованьом диґиталного давача на емисийней станїци „Червени Чот”, на Фрушкей гори нєшка у подполносци диґитализоване емитованє телевизийней програми на териториї Войводини.

Треце по шоре виключованє аналоґного сиґнала у Сербиї и преход на диґиталну телевизию вєдно на „Червеним Чоту” окончели державни секретар у Министерству тарґовини, туризма и телекомуникацийох Татяна Матич, окончователь длужносци директора ЯП Емисийней технїки и вязох Бранко Ґоґич и предсидатель Совиту Реґулацийного цела за електронски медиї (РТЕМ) Ґоран Караджич.

Наглашуюци же проєкт диґитализациї Сербиї принєше насампредз технолоґийни викрок и напредованє у нашей жеми, Матичова гварела же познєйше, аналоґни фреквенциї котри ше буду предавац на аукциї, принєшу значни приходи до буджету Републики Сербиї.

Ґоґич визначел же комплетни проєкт диґитализациї у нашей жеми будзе закончени скорей 17. юния, остатнього термину котри предвидзени зоз одвитуюцу медзинародну догварку и же од нєшка гражданє зоз териториї Войводини можу примац и диґитални сиґнал зоз сушедних Горватскей и Мадярскей.

Караджич поволал емитерох же би вихасновали тот сучасни стандард за унапредзенє своєй програми цо принєше значни вигодносци патрачом, а звекша їх приходи.

ПОВЯЗАНИ ТЕКСТИ