Креативни тим младих зоз КУД „Тарас Шевченко” у Дюрдьове уж даскельо роки орґанизує креативни роботнї. Нєвичерпни су з идеями и сцелосцу, бо и того року, пияти рок зашором планую орґанизовац циклус роботньох за вецей возрости и на вецей теми. Дзекуюци потримовки Управного одбору Дружтва, роботнї уж почали.
Роботнї прешлого року водзела Мария Хромиш котра вєдно зоз Борисом Цапом у Роботним целу за младих Националного совиту Руснацох заступа младих Дюрдьовчанох и їх потреби.
− Прешлого року зме у Дружтве мали вельо роботнї на рижни теми. Початок и конєц рока нам вше резервовани за новорочни роботнї котри орґанизуєме и за наймладших. Вяри, углавним, правиме рижни прикраски за обисце, рижни фиґурки и рамики з ґипсу, шкатули з рижних материялох, або их лєм прикрашуєме. Влєце найчастейше правиме прикраски, ґумки за власи, чати, миндюши, ланцущки, персценї − гварела Мария Хромиш.
Идеї за роботнї находза у специялизованих часописох и на интернету. На початку им нє було лєгко орґанизовац роботнї, бо нїхто од нїх нє мал искуства, анї з таку орґанизацию, анї представу о тим же дзе єст купиц материяли хтори им треба. Тераз им уж вельо лєгчейше.
− З початку нам нє було лєгко пренайсц шицко цо нам требало, а тераз ше уж добре знаходзиме. Любим правиц предмети з руку, а найволїм кед правиме дацо нове, бо зме вец шицки зацикавени як то будзе випатрац. Нє обаваме ше пробовац хасновац нови материяли − гварела Оля Балїнт котра часто помага Мариї коло роботньох и єдна з найактивнєйших у младежскей орґанизациї. На роботньох ше намагаю правиц хасновити предмети, а найнащивенши роботнї на тему новорочних шветох и роботнї з декупаж технїку.
− Любим ше дружиц у нашим Дружтве, а тоти роботнї барз креативни та барз любим ходзиц на нїх. Декупаж технїку наволїм, лєгко ше ю применює, а финални продукт барз красни − гварела Даря Хромиш.
− О темох за роботнї ше вєдно радзиме. Пачи ми ше же шицко цо научим на роботньох, можем и дома направиц, алє, заш лєм интересантнєйше робиц у дружтве. Часто викладаме нашо продукти, людзе на нїх позитивно реаґую − гварела Весна Балїнт, котра участвує у каждей роботнї.
На роботньох правя и рижни продукти з рециклажного материялу, з новинох, картонских шкатулох и пластичних фляшох. Тиж так, пред шицкима подїями хтори млади орґанизую у КУД-у, пририхтую вше иншаку декорацию. Нїч нє купую готове, бо би вец мушели видвоїц вельо вецей средства.
На роботнї, як млади гваря, вше шицки поволани, од найстарших по наймладших. Потераз орґанизовали вецей як сто роботнї.
Од самого початку, креативни роботнї потримує Национални совит Руснацох, з початку Одбор за младеж и спорт, а потим Роботне цело за младеж котре прешлого року обявело конкурс за сoфинансованє проєктох за младих, дзе млади креативци конкуровали з планом роботи креативних роботньох за чечуци рок.
КРЕАТИВЦИ ВИКЛАДАЮ СВОЙО ПРОДУКТИ
Продукти найчастейше викладали у Дюрдьове на кирбаю дзе представяю младих креативцох зоз КУД „Тарас Шевченко”, алє и пред Фестивалом жридлового шпиваня „Най ше нє забудзе” и на Вельконоцним концерту. Викладали и у Руским Керестуре”, у Жаблю и Новим Садзе. Свойо продукти поряднє дарую за томболу на дюрдьовским Балу широких сукньох, а любели би их частейше викладац у других наших местох, на кирбайох, фестивалох або манифестацийох.
