ДЮРДЬОВ – У Основней школи Йован Йованович Змай у Дюрдьове, у тим школским року першираз почало робиц предлужене пребуванє. Отворене є од 7,30 до 12,30 годзин. До ньго ходза школяре першей и другей класи, а з нїма роби учителька Мелания Саламун та дзеци, окрем по сербски, у предлуженим пребуваню можу бешедовац и по руски.
Же би ше предлужене пребуванє отворело, мушело ше приявиц найменєй двацецпецеро школяре. Ґрупа швидко формована понеже ше у кратким чаше приявели двацец осмеро школяре, а число школярох котри ше жадаю уписац з дня на дзень вше векше.
Понеже тоти школяре на наставу одходза лєм предполадньом, у предлуженим пребуваню ше зменюю два ґрупи и, дзекуюци тому, отримує ше добри баланс и нє прави ше гужва у учальнї. Перша ґрупа школярох приходзи пред наставу, а друга по законченю настави у школи.