НОВИ САД – Тогорочни род жита би мал буц коло 2,4 милиони тони, а урожай штири тони по гектаре, гварел директор Продуктней берзи у Новим Садзе Жарко Ґалетин, а преноши Танюґ. Спрам того, жита будзе достаточно и за сербске тарґовище и за вивоз, алє мож обчековац и малу цену.
Гоч продукователє раховали же цена жита будзе дацо вецей як 20 динари за кґ, Ґалетин оценєл же у наиходзацей жатви одкупйоваче за жито нє буду плациц вецей як 17 динари за килограм, та поручел продуковательом же би жито зачували и причекали лєпшу цену.
– Кед ше ма у оглядзе же зме вивезли коло 450 000 тони лоньского жита, цо два раз менєй як рок пред тим, то значи же будземе мац вельке понукнуце, а нїзку цену жита под час жатви. Кельо знаме, держава нє будзе интервеновац на тарґовищу жита, так же Продуктна берза порихтана прилапиц тоту робу и пренайсц купцох за продуковательох котри ю сцу такой предац – гварел Ґалетин за Танюґ.