У Заґребу вистава крачунских обичайох националних меншинох

автор дюлї
1k Опатрене

ЗАҐРЕБ/ГОРВАТСКА – Седемнац национални меншини хтори жию у Горватскей свойо крачунски обичаї представели прейґ роботнї традицийней кухнї, виробки прикраскох и з концертом, а у рамикох вистави „Крачун националних меншинох”, хтора всоботу, 28. новембра отворена у Етноґрафским музею у Заґребу. Вистава тирва по 10. януар 2016.  року.

 6-Zagreb-02

На вистави виложени и предмети и фотоґрафиї вязани за крачунски обичаї националних меншинох, медзи нїма и Руснацох, котрих на тей манифестациї представяли припаднїки нашей меншини зоз Заґребу. Хор, у хторим були припаднїки вецей меншинох, з тей нагоди по старославянски одшпивал и єдну нашу коляду.

Кажда национална меншина сама вибрала з чим сце буц представена и цо дума же єй окремносц, та нащивителє можу видзиц числени вариятни крачунского хлєба, колачох, лєбо файти єдлох хтори ше пририхтує за Крачун, док централни округли стол представя заєднїцтво хторе их повязує до фамелиї позбераней за крачунским столом у Заґребу.

Автор вистави др Филип Шкилян на отвераню визначел же богатство националних меншинох обачлїве праве у розличносци обичайох хтори меншини чуваю, и прейґ хторих ше им поспишело зачувац свой национални идентитет.

 Izložba 'Božiæ nacionalnih manjina' u Etnografskom muzeju

– Даєдни меншини у Горватскей присутни вецей як 500 роки, даєдни менєй, алє кажда з нїх представя красну коцочку мозаику Горватскей. Предмети рижнородни и ясно дочаровюю крачунске розположенє, а вистава нас злучує коло єдного велького хритиянского швета, Крачуна, хтори векшина националних меншинох преславює на розлични способи, алє то ище єдно потвердзенє складного заєднїцтва у главним городзе Републики Горватскей, Заґребу – гварел Шкилян на отвераню вистави „Крачун националних меншинох”.

Виставу провадзи и окремни каталог у хторим описани крачунски обичаї националних меншинох у Горватскей.

ПОВЯЗАНИ ТЕКСТИ